Кимдир яланғоч қаранг, қилпиллаб юрар аранг,
Кимда ҳижоб ранг баранг, куфру - имонни кўрдим.

Кимда бор кибру - ҳаво, кимдир дарди – бедаво,
Мусулмонобод маъво, кофиристонни кўрдим.

Бир тарафида бойлар, бир тарафда гадойлар,
Осмонда юлдуз ойлар, моҳитобонни кўрдим.

Тор кўчаларда одам, тиним билмас бирор дам,
Ким ғамда, кимдир хуррам, бир оломонни кўрдим.

Савдогарлар, баққоллар, саллалару - соқоллар,
Йигит қиз, кампир чоллар, жумла - жаҳонни кўрдим.

Масжидлар ҳар томонда, қурилган қай замонда,
Ҳаммаси тинч омонда, амон - амонни кўрдим.

Ҳайратда қолди Саҳвий, Ҳаққа хос илми ғайбий,
Ҳамдлар бўлсин ё Раббий, яхши - ёмонни кўрдим.

Саҳвий