«ЭРКАКЛАРГА ИШОНМАЙМАН...»
(кўнгилсиз ҳажвия)

У ёғи ошхона бу ёғи пивохонанинг ўртасига қурилган ҳашаматли пуллик ҳожатхонанинг олдида анчагина одам тизилишиб турганига кўзим тушди. “Зўр-ку”, дедим ичимда. Камида эллик миллион билан бут бўлган бу шинам корхонанинг эгаси учун анча хурсанд бўлдим. Шу-унча пул сарфлагандан кейин фойдасини чиқариб олиши керак-да. Лекин ошхонадагилар билан ҳожатхонадагиларнинг ҳамкорлигига қойил қолмай илож йўқ. Чойхоначилар, одамларга раҳми келиб бир чойнак оддий чойни беш юз сўмга ҳам бериб юбораверишади. Бундай сахийликдан ийиб кетган чойхўр бир чойнакни ўрнига икки чойнак ичади. Бир оздан сўнг эса унда ҳожатхонага кириб чиқиш истаги туғилиб қолади. У ёққа бир марта кириб чиқиш нархи минг сўм. Фарқи йўқ, қадам ранжида қилдингизми, минг сўм шитир санайсиз, бўлмаса ҳолингиз вой. Кеча ўша ерда битта йигит оғирлигини дам у ёғига, дам бу ёғига солиб, ғалати ҳаракатлар қилиб, ҳожатхона бекасига ялиниб турибди:
-Жон опажон, шундай кираману-чиқаман...
Шинам ҳожатхонанинг йўлагига қурилган ойнали уйчада опахон иштаҳа билан тушлик қилаётган экан.
-Минг сўм тўлагин-да, менга деса, бир соат ўтиргин, манга фарқи йўқ. Кириб олганингдан кейин нима қилишингни ман қайдан биламан! – деди лунжининг ёғини артиб.
-Опа-а, ишонинг, ёнимда беш юз сўм қолди, холос. Қолганини эртага опкелиб бераман...
-Э-э, ман эркакларга умуман ишонмайман! – деди бека шанғиллаб. - Ишини битиргунча ялинади-ёлворади, кейин қорасиниям кўрсатмайди. Мана, мана шу дафтарчага оти ёзилган эркакларни ҳаммаси ёздириб қўйиб, кириб-чиқаверган. Эллик кишидан ортиқ. Яна шунчаси ҳужжатини гаровга қўйиб кириб чиққан. Мендаям план бор. Хўжайин ҳар куни яхши ишламаяпсан, деб сўкади. 
-Жо-он опа, кириб чиқай бўлмаса ҳозир...
-Вой... хўп майли, кирасан-у лекин чиқмайсан.
-Ие, нега?!
-Ман билан бирпас чой ичиб ўтирасан. Сал вақтдан сўнг яна бир марта кириб чиқасан. Шунда икки минг сўм қарз бўласан. Бирон-бир ошна-оғайнингга телефон қилсанг, келиб сани қутқариб кетади.
-Хўп, хўп! - деди ноилож қолган йигит ва ўқдай отилиб ичкарига кириб кетди...
Ҳожатхона бекасини бироз гапга солган эдим, дардини дастурхон қила бошди:
-Бизга ҳам қийин, ука. Нималар қилмадик мижозларни кўпайтириш учун! Қулайлик яратамиз, мижозларимиз ичкарида хушкайфиятда ўтиришсин, деб мусиқа қўядиган бўлдик, ҳожатхона қоғозларига хушбўй атирлар сепдик, эшиклар тепасига “Хуш келибсиз!” деган ёзувларни ёздириб қўйдик... Шу кунларда хўжайин зўр бир иш қилиш ҳаракатида юрибди. Ҳожатхонанинг ўзида мини ошхона, мини бар ташкил қилмоқчи...
Ҳайратланганимни кўрган опахон илҳомланиб кетди.
-Яна бир зўр янгилик бор, - деди овозига сирли тус бериб. - Нархларни ҳам ҳар-хил қилиб ўзгартириш ниятидамиз. Унисига алоҳида, бунисига алоҳида.
-Ие... қайдан биласиз, ичкарига кириб кетгач...
-Ҳар бир мижоз ҳожатхонага кириб бориши биланоқ ўша кабинага ўрнатилган видеокамера ишлаб кетади, - деди опахон “қойилмисан” дегандек гердайиб. – Мен унинг нима билан машғул бўлганини бу ерда экран орқали кўриб ўтираман. Қани тониб кўрсин-чи! Ўзига қўйиб кўрсатаман записни...
-Бу ерда ошхона, бар очилади дедингизми?
-Ҳа-да! Шунда оборот кучаяди, ука Биз тез ҳазм бўладиган овқатлар тайёрлаймиз...
-Мижоз овқатланиб бўлибоқ кетиб қолса-чи?
-Кетолмайди! Биз уни чалғитиш учун бепул кино кўришга ёки бўлмаса, бироз мизғиб олишга таклиф қиламиз.
-Рақобатчилар топилиб қолса...
-Биз бу ерда энг арзон овқатлар тайёрлаймиз-да. Бунинг устига, хўжайин турли ташкилотлар билан шартнома тузмоқчи. Ташкилотларнинг ўзида пуллик ҳожатхоналар очамиз. Ташкилот раҳбарлари учун хизматларимизни бепул қилиб қўйсак, олам гулистон!
-Бундай шартнома тузадиган раҳбарлар топилармикин?
-Вой, нима деяпсиз, ука, жон-жон деб кўнишади. Уларга нима! Ходимларини маошидан бизга пул ўтказиб беришади, тамом!.. Ҳожатхонамиз билан шартнома тузишга рози бўлган раҳбарлар портретини ҳожатхонамизнинг ҳурмат тахтасига илиб қўямиз, бу биринчидан. Иккинчидан, раҳбарларга биз махсус, юмшоқ пахталар билан хизмат кўрсатамиз. Улар ишдан бўшаб кетганларидан сўнг ҳам фахрий аъзоларимиз сифатида имтиёзли хизматларимиздан фойдаланаверадилар
-Оддий мижозларга ҳам имтиёзлар бериладими?
-Албатта! Фавқулотда ҳолатлар бўлиб қолса, масалан, қовун еб, орқасидан сув ичиб қўйганлар учун ярим нархларда хизмат қиламиз. Бизда ишлаб чиқариш ривожланмаяпти, дейишади баъзилар. Мана ишлаб чиқариш! Биз кейинчалик кўп қаватли уйлардаги ҳожатхоналарни ёпиб, ҳар бир дом олдида пуллик филиалларимизни ташкил этмоқчимиз. Хўжайин ҳозир шу масалада катталарнинг розилигини олиш ҳаракатида юрибди... Вой-вой, йигит ўлгурни қочиб кетишини қаранг! Ҳой, тўхта дедим, тўхта!.. Қочиб кетди-я, аблаҳ! Айтаман-ку, эркакларга ишонмайман деб...                                                 

                                            Абдужаббор УМАРОВ.