ТИНЧЛИК БОРКИ, БАЙРАМЛАР БОҚИЙ

Мамлакатимиз бўйлаб энг улуғ, энг азиз, энг қутлуғ, муборак ва муқаддас байрам - Мустақиллигимизнинг 25 йиллик навқирон тўйини катта тантаналар ва улкан ютуқлар ила муносиб қарши олишга қизғин ҳозирлик кўрилмоқда. Ушбу сана муносабати билан жойларда бошлаб юборилган ва изчил давом этаётган турли тадбирлар эса, кўтаринки руҳда, юксак савияда ўтаётганини алоҳида таъкидлаш жоиз.

Дарҳақиқат, истиқлол туфайли юртимиз ва халқимиз ҳаётида улкан ўзгариш ва катта янгиланишлар рўй берди. Мана, чорак асрдирки, биз қўлга киритаётган юксак марраларга жаҳон ҳамжамияти ҳайрат ва ҳавас билан қараб келмоқда.

Айниқса, мамлакатимизда миллий қадриятларимиз, қадимий урф-одат ва анъаналаримизнинг қайта тиклангани, бой маънавий-маърифий, маданий меросимизнинг яна юзага чиққани, дин ва маънавият соҳаларида ҳам мислсиз саъй-ҳаракатлар амалга оширилгани диққатга сазовордир. Биргина Рамазон ва Қурбон ҳайитининг халқимизга қайта туҳфа қилингани, минглаб масжидларнинг фаолият юритаётгани, фуқароларимиз учун авваллари фақатгина орзу-армон бўлган "Ҳаж" ва "Умра" зиёратларига эмин-эркин бориш имконияти яратилганининг ўзи ушбу фикрларимизнинг яққол мисолидир. Минг­лаб фуқароларимиз ҳар йили Маккаи Мукаррама ва Мадинаи Мунаввара сингари муқаддас диёрларга бориб, ибодатларини мукаммал адо этишлари учун ҳукуматимиз томонидан яратиб берилаётган барча қулайлик ва шароитлар сизу бизга чексиз қувонч бахш этади. Шунингдек, фан, таълим, тиббиёт, спорт каби турли соҳаларда ҳам улкан марраларга эришаётганимиз, дастурхонларимизнинг тўкин-сочинлиги, фарзандларимизнинг ҳур диёрда эмин-эркин ўсиб-улғайишлари, ҳосилдорликнинг мўл-кўллиги, кўпмиллатли халқимизнинг тинч-омонлиги, динлараро бағрикенглик ва миллатлараро тотувликнинг барқарорлиги туфайли барча байрамларни катта хурсандчилик билан, тилимиздан тушмас шукроналар билан тантана қилмоқдамиз.

Ҳа, халқимизга хос юксак фазилатлар ҳақида сўз кетганида, мурувват ва меҳр-оқибат, саховатпешалик алоҳида тилга олинади. Чиндан ҳам, бу каби инсоний хислатлар юртдошларимизнинг кундалик ишлари, ниятлари, саъй-ҳаракатлари билан уйғунлашиб кетган.

Зеро, инсон ва унинг манфаатлари устувор саналган мамлакатимизда олиб борилаётган оқилона сиёсат замирида ҳам аҳоли турмушини янада фаровон этиш, нуронийларни эъзозлаш, вояга етаётган ёш авлодни қадрлашдек улуғвор мақсадлар мужассам. Шу маънода, давлатимиз раҳбарининг жорий йил 1 июлда эълон қилинган "Рамазон ҳайитини нишонлаш тўғрисида"ги Қарори эзгуликнинг ёрқин ифодаси сифатида барчамизга хушнуд кайфият бахш этди. Истиқлол шарофати билан мана бир неча йилларки, миллий-диний қадриятларимиз тикланиб, Рамазон ва Қурбон ҳайити каби улуғ айёмлар кенг байрам қилиб келинмоқда. Саховатпешалик, меҳр-мурувват сингари инсонпарварлик туйғулари янада кенг намоён бўладиган ушбу кунда юртдошларимиз ҳайит намозларини эмин-эркин адо этиб, мамлакатимиздаги тинч­лик-осо­йишталик, тўкин-сочинлик ва фаровонлик учун Яратганга шукроналар келтиради. Фарзандлари, набираларини турли ширинликлар билан сийлайди, яқинларига сов­ға-салом улашади.

Эътироф этиш жоиз, Рамазон ойи халқимизнинг маънавий-руҳий ҳаётида алоҳида ўрин тутади. Бу ой жамиятимизда меҳр-оқибат, ўзаро ҳурмат ва ҳамжиҳатлик муҳитини янада мустаҳкамлаш, миллий-диний қадриятларимизни асраб-авайлаш ва улуғлашда муҳим аҳамиятга эга. Ушбу фазилатли айёмнинг умумхалқ байрами сифатида нишонланиши, Рамазон ва Қурбон ҳа­йитларининг дам олиш кунлари деб эълон қилингани эса, юртимизда муқаддас динимизга кўрсатилаётган ғамхўрликнинг амалдаги ёрқин ифодасидир.

Ҳайит кунларида ҳар бир маҳалла, овул ва қишлоқда ёлғиз кексалар, ногиронлар, боқувчисини йўқотганлар, кам таъминланган оилалар, Иккинчи жаҳон уруши қатнашчилари, меҳнат фахрийлари, нуронийлар ҳолидан хабар олиниши бизда ўзига хос анъанага айланган. Меҳрибонлик, Мурувват ва Саховат уйларига моддий ва маънавий ёрдамлар кўрсатиш корхона, ташкилот, муассасалар, тадбиркор ва ишбилармон юртдошларимиз учун юксак инсонпарварлик намунасидир.

Ҳақиқатан ҳам, азалий қадриятларимизга ҳамоҳанг ушбу айём кунларида халқимизга хос хислатлар ҳар доимгидан кўра кўпроқ кўзга ташланади. Беморлар ҳолидан хабар олиниб, ёрдамга муҳтож инсонларга хайр-саховат кўрсатилади, ҳадялар қилинади, ёлғиз, боқувчисини йўқотган фуқароларга совға-саломлар улашилади. "Маҳалла" хайрия жамоат фонди, "Нуроний" жамғармаси, "Камолот" ёшлар ижтимоий ҳаракати ва бошқа ташкилотлар ҳамкорлигида ўтказилаётган бу каби савобли амаллар юртдошларимиз ўртасида меҳр-мурувват, аҳиллик, оқибат, ишонч ришталарининг янада мустаҳкамланишига хизмат қилиши табиий. Жойларда амалга оширилаётган кенг кўламли ободонлаштириш ишлари, кўча ва хиёбонлар, масжидлар, муқаддас қадамжолар, қабристонларнинг тартибга келтирилаётгани, кўмакка муҳтожларга ёрдам қўлини чўзиш каби халқимизнинг эзгу анъаналари шу кунларда янада ёрқинроқ намоён бўлмоқда.

Бу йил ҳам Рамазон ҳайити биз учун энг улуғ, энг азиз айём - Мустақиллик байрами шодиёналарига уйғун тарзда нишонланмоқда. Бу мана шундай хайрли кунларда ҳар биримизнинг қалбимизда шукроналик туйғусини, ҳаётдан розилик ҳиссини жўш урдириши шубҳасиз. Зеро, тинч­лик ва осойишталик, халқимиз эришаётган улкан ютуқ ва марралар - буларнинг барчаси истиқлол туфайлидир.

Жорий йилнинг Соғлом она ва бола йили, деб номланиши, айниқса, юртимизда кенг нишонланаётган Рамазон ҳайити шодиёналарига ўзгача руҳ бағишламоқда. Бу йил шарофати билан келажагимиз ворислари бўлган болажонлар ва ҳамиша ҳурмат ва эъзозимизда бўлган оналарга эътиборимиз янада кучайди. "Соғ­лом она ва бола йили" Давлат дастурида белгиланган кенг кўламли ва катта ҳажмдаги вазифаларнинг реал ҳаётимизга тадбиқ этилаётгани, она ва болага қаратилаётган юксак эътибор, моддий ва маънавий ёрдамлар, яратилаётган шарт-шароитлар, берилаётган имтиёзлар, буларнинг барчаси юртимизда инсон, унинг манфаатлари ҳамма нарсадан устун эканлигининг яна бир ёрқин далилидир.

Энг муҳими эса, мамлакатимизда тинч ва осойишта ҳаёт, хавфсиз турмуш тарзи, бунёдкорлик, яратиш-яшнатиш завқи мужассам. Ана шу тинчликнинг қадрига етиш, уни асраб-авайлаш, лозим бўлса тинчлик учун курашиш ўзини шу азиз Ватан тақдирига, эртанги кунга дахлдорман, деб билган ҳар бир инсоннинг фуқаролик бурчи ва масъулиятидир. Шуни унутмасак бас. Ахир тинчлик ва осудалик бар­қарорлик бўлсагина, кўнглимизга байрамлар сиғади. Шундай экан, бугун биз бошимиздан кечираётган ўта таҳликали замонда, ён-атрофимизда турли таҳдид ва хатарлар кучайиб бораётган бир шароитда энг катта ва бебаҳо бойлигимиз бўлган тинчлик ва осо­йишталикни кўз қорачиғидек асраш, миллатлар ва фуқаролараро дўстлик ва ҳамжиҳатлик, ўзаро ҳурмат ва меҳр-оқибат муҳитини янада мустаҳкамлаш, доимо ҳушёр ва огоҳ бўлиб, тинчлик учун курашиб яшаш ҳал қилувчи аҳамиятга эга эканини ҳеч қачон унутмаслигимиз даркор.

Бугун нишонланаётган Рамазон ҳайитини миллий қадриятларимизга мос тарзда ўтказиш бўйича амалга оширилаётган ишлар, бундай хайрли ва эзгу саъй-ҳаракатларимиз эса, халқимиз ўртасида меҳр-оқибат, ўзаро ҳурмат ва ҳамжиҳатлик, бағрикенглик, саховат ва қаноат каби юксак фазилатларни қарор топтиришга хизмат қилаверади.

Шуҳрат ДЕҲҚОНОВ